რუსეთ-უკრაინის 2022-24 წლის ომი

ატომური ენერგიის საერთაშორისო სააგენტოს დელეგაცია ზაპოროჟიეში გაემგზავრა

ზაპოროჟიეს ატომური ელექტროსადგური, 4 აგვისტო
REUTERS/Alexander Ermochenko

გაეროს ატომური ენერგიის საერთაშორისო სააგენტოს (IAEA) ექსპერტთა 14-კაციანი დელეგაცია კიევიდან ზაპოროჟიეს ატომურ ელექტროსადგურზე გაემგზავრა. ამის შესახებ საკუთარ Telegram-გვერდზე ენერგოატომმა გამოაქვეყნა განცხადება.

"2022 წლის 31 აგვისტოს დილით IAEA-ს მისია გაემგზავრა ზაპოროჟიეს ატომურ ელექტროსადგურში". - ნათქვამია შეტყობინებაში.

ჯგუფი კიევში 30 აგვისტოს ჩაფრინდა. მათ სააგენტოს დირექტორი, რაფაელ მარიანო გროსი ხელმძღვანელობს. მან 29 აგვისტოს Twitter-ზე დაწერა, რომ ექსპერტები ზაპოროჟიეს ატომურ ელექტროსადგურზე ამ კვირის დღეებში ჩავიდოდნენ. 

"დრო მოვიდა, IAEA-ს მხარდაჭერისა და დახმარების მისია გზაშია. ჩვენ უნდა დავიცვათ უკრაინისა და ევროპის უდიდესი ბირთვული ობიექტის უსაფრთხოება. მეამაყება, რომ გავუძღვები ამ მისიას, რომელიც ზაპოროჟიეს ატომურ ელექტროსადგურზე ამ კვირის დღეებში ჩავა". – დაწერა Twitter-ზე რაფაელ მარიანო გროსიმ.

25 აგვისტოს, ისტორიაში პირველად, ენერგოქსელიდან ზაპოროჟიეს ატომური ელექტროსადგურის ყველა ბლოკი გაითიშა

ენერგოატომის ინფორმაციით, 25 აგვისტოს ზაპოროჟიეს თერმული ელექტროსადგურში გაჩენილმა ხანძარმა გამოიწვია ზაპოროჟიეს ატომური ელექტროსადგურის უკანასკნელი, მეოთხე კავშირის ხაზის ორჯერ გათიშვა. დანარჩენი სამი ხაზი აქამდე რუსი ოკუპანტების იერიშების შემდეგ გაითიშა. შედეგად, ქსელიდან გაითიშა უკანსკნელი მოქმედი ორი ენერგობლოკი. 

26 აგვისტოს ცნობილი გახდა, რომ ზაპოროჟიეს ატომური სადგურისთვის ელექტროენერგიის მიწოდება თბოსადგურის ერთი წყაროდან განახლდა.

ზაპოროჟიეს ატომური ელექტროსადგური 4 მარტიდან რუსეთის შეიარაღებული ძალების ხელშია. დაწესებულების უკრაინელ ინჟინრებს მუშაობის გაგრძელება რუსეთის ზედამხედველობის ქვეშ შეეძლოთ.

ევროკავშირმა და 40-ზე მეტმა ქვეყანამ რუსეთს ზაპოროჟიეს ატომური ელექტროსადგურიდან ჯარების გაყვანისკენ მოუწოდა.

კომენტარები