ახლადარჩეული პრეზიდენტის, დონალდ ტრამპის ვებსაიტზე მისი განცხადება, ამერიკის შეერთებულ შტატებში მუსლიმების არშეშვებასთან დაკავშირებით, წაშლილია. ტექსტის ბმული ამჯერად მისი დონაციის გვერდზე გადადის. განცხადება ხელმისაწვდომი ჯერ კიდევ არჩევნების დღეს, 8 ნოემბერს იყო.
2015 წლის დეკემბერში, პარიზის ტერაქტების შემდეგ, ტრამპმა თქვა, რომ ის დროებით აკრძალავდა ქვეყანაში მუსლიმების შეშვებას, სანამ არ გაარკვევდა "რა ჯანდაბა ხდება". ეს იმ განცხადებებიდან ერთ-ერთია, რის გამოც ტრამპი მწვავედ გააკრიტიკეს.
თავად ტრამპი და მისი მოკავშირეები კი ამბობდნენ, რომ ეს იქნებოდა ერთ-ერთი ზომა ამერიკელების უსაფრთხოების დასაცავად და არა რელიგიური დისკრიმინაცია.
ტრამპის ოფისს ჯერჯერობით არ გაუკეთებია კომენტარი, რატომ გაქრა საიტიდან მისი განცხადება.
დონალდ ტრამპმა საპრეზიდენტო არჩევნებში ელექტორალური კოლეგიის 279 ხმით გაიმარჯვა.
