საქართველოს სტატისტიკის ეროვნულმა სამსახურმა ბიზნესსექტორში არსებული მდგომარეობის შესახებ ბოლო მონაცემები გამოაქვეყნა. ოფიციალური მონაცემებით, 2011 წლის მესამე კვარტალში ბიზნეს სექტორში სულ 360 ათას 100 ადამიანია დასაქმებული. დასაქმებულთა მთლიანი რაოდენობიდან 62.1% მსხვილ ბიზნესზე, 23.1% მცირე ბიზნესზე, ხოლო 14.7% საშუალო ბიზნესზე მოდის. ბიზნეს სექტორში დასაქმებულთა რიცხვი გასული წლის ანალოგიურ პერიოდთან შედარებით 5.1 ათასი ადამიანით (2%-ით) ნაკლებია. თუმცა, აპრილ-ივნისთან შედარებით ივლის-სექტემბერში ბიზნეს სექტორში დასაქმებულთა რიცხვი 8 ათასი ადამიანით არის გაზრდილი.
ბიზნეს სექტორში დასაქმებულთა საშუალო თვიური ხელფასი 717.7 ლარს შეადგენს. საწარმოთა ზომის მიხედვით საშუალო თვიური ხელფასის გადანაწილება შემდეგნაირია: მსხვილი ბიზნესი - 813.2 ლარი, საშუალო ბიზნესი - 510.7 ლარი და მცირე ბიზნესი - 507.1 ლარი.