იშვიათი დაავადებების საკითხზე მომუშავე საკოორდინაციო საბჭომ აქონდროპლაზიის ეროვნული პროტოკოლი დაამტკიცა. ამის შესახებ საბჭოს წევრმა ივანე ჩხაიძემ ჟურნალისტებთან ისაუბრა.
მისი თქმით, პროტოკოლმა გერმანელი ექსპერტისგან მაღალი შეფასება მიიღო.
"პროტოკოლმა მიიღო ძალიან მაღალი შეფასება გერმანელი ექსპერტისგან, რომელმაც პირდაპირ აღნიშნა, რომ ამ დაავადებასთან დაკავშირებით ასეთი კარგი, დეტალური და ინფორმატიული პროტოკოლი მსოფლიოში დღეისათვის არ არის, რაც გვაძლევს უფლებას, ვთქვათ, რომ დღეიდან უკვე საქართველოს აქვს ამ დაავადების დიაგნოსტიკისა და მართვის ერთი-ერთი საუკეთესო პროტოკოლი".-ამბობს ჩხაიძე.
ამასთან ჩხაიძე აღნიშნავს, რომ განისაზღვრა ტექნიკური საკითხები, როგორ უნდა მოხდეს მედიკამენტის დანერგვა და ადმინისტრირება. როგორც საბჭოს წევრმა თქვა, პირველ ეტაპზე 5-6 ბავშვის მკურნალობა იქნება უზრუნველყოფილი, რადგან მათ ზრდის ზონები მალევე ეხურებათ.
ჩხაიძე ამბობს, რომ ზუსტი თარიღი უცნობია, თუმცა 2023 წლის სექტემბერში მედიკამენტი აუცილებლად შემოვა, მკურნალობა კი თავდაპირველად მხოლოდ იაშვილის ბავშვთა ცენტრალურ საავადმყოფოში იქნება შესაძლებელი.
მან განმარტა, რომ ამის მიზეზი ის გვერდითი ეფექტებია, რომლებიც შეიძლება მედიკამენტს მოჰყვეს და, რომლებიც მეთვალყურეობას მულტიპროფილურ კლინიკაში საჭიროებს.
"ამ მედიკამენტს გააჩნია გარკვეული გვერდითი მოვლენები, რომელსაც შესაძლოა, დასჭირდეს სამედიცინო ჩარევაც კი. ამიტომ შერჩეულ იქნა ერთი კლინიკა საქართველოში. ეს არის იაშვილის ბავშვთა ცენტრალური საავადმყოფო. იმიტომ, რომ პროტოკოლის დანერგვას, პაციენტების დეტალურ შესწავლას სჭირდება მულტიპროფილური კლინიკა, მინიმუმ 6-7 სხვადასხვა სპეციალისტის მონაწილეობით, რაც იაშვილის კლინიკაში არის უზრუნველყოფილი. ასევე, განისაზღვრა პირველი პერიოდი. ჯერჯერობით რთულია ამის თქმა, ეს იქნება ორი კვირა, ეს იქნება ერთი თვე, მაგრამ პაციენტებს ეს მედიკამენტი მაინც გაუკეთდებათ კლინიკაში, ექიმის დაკვირვების შემდეგ. ბავშვების რაოდენობა პირველ ეტაპზე განისაზღვრა 5-6 ბავშვით".- თქვა ივანე ჩხაიძემ.
2023 წლის აპრილ-მაისში აქონდროპლაზიის დიაგნოზის მქონე ბავშვების მშობლები მთავრობის ადმინისტრაციასთან 19 დღის განმავლობაში აქციებს მართავდნენ და ღამეებს ათენებდნენ. ისინი პრეპარატის Voxzogo-ის საქართველოში შემოტანასა და სახელმწიფოს მიერ დაფინანსებას ითხოვდნენ.
5 მაისს აქციები შეწყდა და მშობლესა და ჯანდაცვის სამინისტროს შორის მოლაპარაკებები დაიწყო.
