27 ივლისს ეროვნულმა ბანკმა მონეტარული პოლიტიკის შერბილების გადაწყვეტილება მიიღო. ბანკმა რეფინანსირების სესხებზე საპროცენტო განაკვეთი 0.25%-ით შეამცირა. ამ გადაწყვეტილებით ქვეყანაში ლარის რესურსი გაიაფდა, რამაც წესით ხელი ბიზნესსაქმიანობას და დასაქმებას უნდა შეუწყოს.
საინვესტიციო ბანკ Galt & Taggart-ის თავმჯდომარე არჩილ გაჩეჩილაძე ფიქრობს, რომ ეროვნულ ბანკს მონეტარული პოლიტიკის კიდევ უფრო მეტად შერბილება შეეძლო. ამის მიზეზი კი ქვეყანაში არსებული დაბალი ინფლაციაა, რის ფონზეც გამკაცრებული მონეტარული პოლიტიკის შენარჩუნება საჭირო არაა.
"აშკარაა, რომ სამიზნე ინფლაცია არის 5%. დღეს ინფლაცია არის 1.5%, ნებისმიერი ტიპის გაიაფება ლარის რესურსის, მგონია, არის კარგი ეკონომიკისთვის. 0.25%-ით შემცირება, მგონია, რომ არის ცოტა, შეიძლება უფრო მეტადაც ამის გაკეთება", - ამბობს გაჩეჩილაძე.
უკვე მეხუთე თვეა, რაც ინფლაციის მაჩვენებელი ეროვნული ბანკის სამიზნე 5%-ზე დაბლაა. საქსტატის მონაცემებით, ივლისში ინფლაციამ 1.5% შეადგინა. ივნისში წლიური ინფლაცია 1.1%, მაისში კი 2.1% იყო.
2016 წელს სამიზნე ინფლაცია 5%-ია, 2017 წლისთვის - 4%, ხოლო 2018 წლისთვის - 3%.
