საქართველოს საგარეო საქმეთა მინისტრი მაია ფანჯიკიძე აგვისტოს ომის 6 წლისთავთან დაკავშირებით ამბობს, რომ "რუსეთი განაგრძობს აგრესიულ ქმედებას, რუსეთი ისევ აშენებს ხელოვნურ ბარიერებს და მავთულხლართებს საოკუპაციო ხაზის გასწვრივ, რითიც ზღუდავს ადამიანის უფლებებს, არღვევს ადამიანის ფუნდამენტურ თავისუფლებებს. ყოველივე ამის გადალახვა და ყველა ამ საკითხის მოგვარება არის საქართველოს მთავრობის უმთავრესი ამოცანა". მისივე თქმით, "იმედით უნდა ვუყუროთ მომავალს, რადგანაც ჩვენ ვდგავართ სწორ გზაზე".
"დღევანდელი დღე არის ტრაგიკული დღე საქართველოს ისტორიაში. ეს არის დღე, როდესაც 6 წლის წინ დაიწყო ომი რუსეთთან. საქართველო ჩათრეული აღმოჩნდა ამ ომში. ძალიან ბევრი ადამიანი დაიღუპა. ძალიან ბევრი ოჯახი გაუბედურდა. ჩვენ მივედით მუხათგვერდის სასაფლაოზე, რათა პატივი მიგვეგო დაღუპულთა ხსოვნისთვის და კიდევ ერთხელ თანაგრძნობა გამოგვეცხადებინა დაღუპულთა ოჯახებისთვის. სამწუხაროდ, ამ ომის შედეგებს დღესაც ვიმკით. დღესაც ოკუპირებულია საქართველოს 20%. დღესაც გვაქვს უამრავი პრობლემა, გვყავს უამრავი იძულებით გადაადგილებული პირი. საოკუპაციო ხაზის გასწვრივ სოფლებში დღესაც არის პრობლემები. რუსეთი განაგრძობს აგრესიულ ქმედებას, რუსეთი ისევ აშენებს ხელოვნურ ბარიერებს და მავთულხლართებს საოკუპაციო ხაზის გასწვრივ, რითიც ზღუდავს ადამიანის უფლებებს, არღვევს ადამიანის ფუნდამენტურ თავისუფლებებს. ყოველივე ამის გადალახვა და ყველა ამ საკითხის მოგვარება არის საქართველოს მთავრობის უმთავრესი ამოცანა. ძალიან მძიმე დღეა დღეს, მაგრამ ამავე დროს იმედით უნდა ვუყუროთ მომავალს, რადგანაც ჩვენ ვდგავართ სწორ გზაზე და დარწმუნებული ვარ, რომ ამ სწორ გზაზე სიარულით გადაიჭრება ყველა პრობლემა, რომელიც ჩვენს ქვეყანას აქვს", - თქვა ფანჯიკიძემ.
რუსეთ-საქართველოს ომიდან 6 წელი გავიდა. 2008 წლის 7 აგვისტოს რუსეთ-საქართველოს მრავალწლიანი კონფლიქტი ღია სამხედრო კონფრონტაციაში გადაიზარდა, რასაც ასეულობით ადამიანის მსხვერპლი, ეთნიკური წმენდა და რუსეთის მიერ საქართველოს ორი რეგიონის ოკუპაცია მოჰყვა.
სამხედრო კონფრონტაცია რუსეთმა საქართველოსთან 2008 წლის გაზაფხულიდან დაიწყო. ვითარება კოდორის ხეობის გარშემო აპრილიდან დაიძაბა. მოსკოვმა აფხაზეთში დამატებითი სამხედრო ძალების და მძიმე ტექნიკის შეყვანა დაიწყო. რუსულმა ავიაგამანადგურებელმა კი ქართული უპილოტო მზვერავი აპარატი ჩამოაგდო. ამას სარკინიგზო ჯარების შემოყვანა მოჰყვა, რომლებმაც სოხუმიდან ოჩამჩირემდე ლიანდაგის აღდგენის ინტენსიური სამუშაოები დაიწყეს. მათი დასრულებისთანავე, ივლისის ბოლოდან ამ რკინიგზით აფხაზეთში სამხედრო ეშელონები დაიძრა.
სიტუაცია ცხინვალის გარშემო ივლისის ბოლოდან დაიძაბა. 2 აგვისტოს ქართული პოლიციის მანქანა ააფეთქეს. ამის შემდეგ ორმხრივი სროლები გახშირდა, ქართული სოფლები რეგულარულად იბომბებოდა ცხინვალის მხრიდან. ბევრი ადამიანი დაშავდა. 6 აგვისტოს სოფელ ავნევთან ორი ქართველი მშვიდობისმყოფელი დაიღუპა.
სწორედ ამ დროს რუსეთმა, მასშტაბური სამხედრო წვრთნების შემდეგ, სამხედრო ნაწილების საქართველოს საზღვრებთან ჯარების კონცენტრაცია დაიწყო. მრავალი წყარო და დოკუმენტი ადასტურებს, რომ რუსულმა რეგულარულმა ნაწილებმა როკის გვირაბით საქართველოში მალულად შემოსვლა დაიწყეს.
საპასუხო ცეცხლის გახსნა 7 აგვისტოს ღამით მას შემდეგ გადაწყდა, რაც ქართული მხარის მიერ ცეცხლის ცალმხრივად შეწყვეტის შემდეგ, ოსურმა და რუსულმა ფორმირებებმა დაბომბვა კიდევ უფრო გააძლიერეს.
ქართული ქვედანაყოფები ცხინვალში შევიდნენ. თუმცა, მალევე კონფლიქტში რუსეთი უკვე ღიად ჩაერია. რუსულმა ავიაციამ ქართული პოზიციებისა და დასახლებული პუნქტების დაბომბვა დაიწყო, ცხინვალისკენ რუსული სახმელეთო ძალები დაიძრა. 11 აგვისტოს ქართულმა ჯარმა თბილისისკენ უკან დაიხია. კონფლიქტი სარკოზი-მედვედევის შეთანხმების გაფორმებით დასრულდა, რომელსაც რუსეთი დღემდე არ ასრულებს და საქართველოს ტერიტორიების ოკუპაციას აგრძელებს.
აგვისტოს ომს საქართველოს 228 მშვიდობიანი მცხოვრები შეეწირა, დაიღუპა 170 სამხედრო მოსამსახურე და 14 პოლიციელი. ამ დრომდე დაკარგულად ითვლება 8 ჯარისკაცი. საცხოვრებელი ადგილი 150 000-მა ადამიანმა დატოვა, მათგან 30 ათასი დევნილად რჩება.
