აშშ-ს ყოფილი პრეზიდენტი, დონალდ ტრამპი გამოეხმაურა უკანასკნელ პერიოდში ჩრდილოეთ კორეის მიერ ბალისტიკური რაკეტების გამოცდას. ტრამპმა აშშ და სამხრეთ კორეა დაადანაშაულა და თქვა, რომ ორ ქვეყანას შორის ჩატარებული სამხედრო წვრთნების გამო ჩრდილოეთ კორეის ლიდერი, კიმ ჩენ ინი "საფრთხეს გრძნობს". ამის შესახებ ტრამპი Truth-ის სოციალურ ქსელში წერს.
"კიმ ჩენ ინი, რომელიც გავიცანი და მასთან კარგი უერთიერთობა მქონდა ჩემი პრეზიდენტობის დროს, უკმაყოფილოა აშშ-სა და სამხრეთ კორეას შორის ჩატარებული მასშტაბური წვრთნებით. ის ამით საფრთხეს გრძნობს". – წერს ტრამპი.
ტრამპმა ასევე აღნიშნა, რომ სამხრეთ კორეა ძალიან ცოტას უხდის აშშ-ს ძვირადღირებული სამხედრო წრთვნებისთვის სანაცვლოდ.
" [სამხრეთ კორეა] ძალიან ცოტას გვიხდის ამ ძალიან ძვირი და პროვოკაციული წრთვნებისთვის. მართლაც აბსურდია". – წერს ტრამპი.
18 თებერვალს, ჩრდილოეთ კორეამ, სავარაუდოდ, შორი მოქმედების ბალისტიკური რაკეტა გაისროლა. ინფორმაციას სამხრეთ კორეის შეიარაღებული ძალები ავრცელებს.
აღნიშნულს ასევე ადასტურებს იაპონიის პრემიერმინისტრი, ფუმიო კიშიდა. კიშიდას მიხედვით, რაკეტა კუნძულ ჰოკაიდოს დასავლეთ ნაწილში, იაპონიის ექსკლუზიურ ეკონომიკურ ზონაში ჩამოვარდა.
იაპონიის თავდაცვის სამინისტრომ გაავრცელა ინფორმაცია, რომ რაკეტამ 5 700 კილომეტრის სიმაღლეს მიაღწია და ჩრდილოეთ კორეის დედაქალაქ ფხენიანიდან 900 კილომეტრი იფრინა.
8 თებერვალს, ღამით ჩრდილოეთ კორეაში კორეის სახალხო არმიის დაფუძნების 75-ე წლისთავისთვის მიძღვნილი სამხედრო აღლუმი ჩატარდა, სადაც წარმოდგენილი იყო ქვეყნის უახლესი შეიარაღება.
სამხედრო აღლუმს შვილთან ერთად დაესწრო ჩრდილოეთ კორეის ლიდერი, კიმ ჩენ ინი.
აღლუმზე განსაკუთრებული ყურადღება მიიქცია წარმოდგენილმა კონტინენტთაშორისმა ბალისტიკურმა რაკეტებმა, მათ შორის, ახალმა, მყარი საწვავის ძრავის მქონე რაკეტებმა და Hwasong-17-ის 11-ზე მეტმა რაკეტამ, რომლებსაც, შესაძლოა, რომ მსოფლიოს ნებისმიერ წერტილში შეუძლიათ ბირთვული იერიშის მიტანა.
"ეს იმაზე ერთობლივად მეტი კონტინენტთაშორისი ბალისტიკური რაკეტაა, ვიდრე ჩვენ ოდესმე გვინახავს ჩრდილოეთ კორეის აღლუმზე". – წერს ამერიკული კვლევითი ინსტიტუტის, Carnegie Endowment for International Peace-ის წარმომადგენელი Twitter-ზე.
აღნიშნული აღლუმი კიდევ ერთი გამოვლინება იყო ჩრდილოეთ კორეის მისწრაფებების, გაეროს უსაფრთხოების საბჭოს მრავალი რეზოლუციისა და სანქციის მიუხედავად, განავითაროს ბალისტიკური რაკეტების წარმოების პროგრამა.
ჩრდილოეთ კორეა ბოლო პერიოდში სარაკეტო წვრთნებს აქტიურად ატარებს. 2022 წელს მოხდა, რეკორდულად, 90-ზე რაკეტის გაშვება.
2022 წლის დეკემბერში, ჩრდილოეთ კორეის განცხადებით, მყარი საწვავის სარაკეტო ძრავა წარმატებით გამოცადეს. ეს ფაქტი კიმ ჩენ ინის რეჟიმისთვის საკონტინენტთაშორისო ბალისტიკური რაკეტის (ICBM) გასროლას დააჩქარებს.
ახალი, მაღალი ბიძგის სარაკეტო ძრავა ხუთშაბათს გამოცადეს. ინფორმაციას კორეის სახელმწიფო ცენტრალური საინფორმაციო სააგენტო (KCNA) ავრცელებს.
სახელმწიფო მედიის მიერ გავრცელებულ ფოტოებზე ჩანს, რომ ჩრდილოეთ კორეის ლიდერი, კიმ ჩენ ინი გამოცდას ესწრებოდა, რომელიც KCNA-ს თქმით, “კიდევ ერთი, ახალი ტიპის სტრატეგიული იარაღის განვითარების გარანტიაა”.
ექსპერტების თქმით, ძრავის განვითარება მნიშვნელოვანი იქნება იმ შემთხვევაში, თუ ახალი სარაკეტო ძრავა წარმატებით ინტეგრირდება ICBM-თან.
„თუ ჩრდილოეთ კორეის მაღალი ბიძგების მყარი საწვავის ძრავის სახმელეთო გამოცდა ისეთივე წარმატებულია, როგორც ისინი აცხადებენ, ეს მნიშვნელოვანი ნაბიჯია ქვეყნის ატომური რაკეტების განვითარებისთვის.” - თქვა ევჰას უნივერსიტეტის პროფესორმა, ლეიფ-ერიკ ისლიმ.
ანალიტიკოსების განმარტებით, მყარი საწვავის რაკეტები უფრო სტაბილურია, ვიდრე თხევადი საწვავის რაკეტები, რომლებიც ჩრდილოეთ კორეამ ადრე გამოცადა. ეს ნიშნავს, რომ მყარი საწვავით მომუშავე ICBM შეიძლება უფრო ადვილად და სწრაფად გადაადგილდეს.
„როგორც კი განთავსდება, ტექნოლოგია ჩრდილოეთ კორეის ბირთვულ ძალებს უფრო მრავალმხრივს, ბრძოლისუნარიანს და საშიშს გახდის“, - თქვა იზლიმ.
ექსპერტების თქმით, მიუხედავად წარმატებული გამოცდისა, მყარი საწვავის ICBM-ის განსათავსებლად მომავალში ბევრი დაბრკოლება შეიქმნება.
„მყარი საწვავის ძრავის სახმელეთო ტესტიდან ოპერატიულ, ზუსტ და საიმედო რაკეტებამდე გადასვლა ბევრ ტექნიკურ დაბრკოლებას მოიცავს. ჩრდილოეთ კორეის მედიამ შესაძლოა გააზვიადოს ქვეყნის იარაღის შესაძლებლობები და განლაგების ვადები“, - თქვა იზლიმ.
CNN-ის ცნობით, ჩრდილოეთ კორეა თავის ბალისტიკურ რაკეტებს რეკორდული ტემპით ამოწმებს.
