ისრაელის თავდაცვის ძალების შტაბის მეთაურის, ავივ კოჰავის თანახმად, ისრაელის სამხედრო ძალებმა ბოლო დღენახევარში ღაზის სექტორში 500-ზე მეტ სამიზნეზე მიიტანა იერიში. კოჰავის თქმით, ისრაელის შეტევის შედეგად ათობით ტერორისტია მოკლული.
"მტკიცედ გვაქვს გადაწყვეტილი მაქსიმალურად სერიოზულად დავარტყათ ტერორისტულ ჯგუფებს". – თქვა შტაბის ავივ კოჰავიმ.
თავდაცვის ძალების შტაბის მეთაურის თანახმად, ისრაელი გააგრძელებს ღაზის სექტორში ჰამასის და დაჯგუფება ისლამური ჯიჰადის წინააღმდეგ შეტევას.
ისრაელის პრემიერმინისტრმა ბენიამინ ნეთანიაჰუმ თქვა, რომ ჰამასი და დაჯგუფება ისლამური ჯიჰადი "დიდ ფასს გადაიხდიდნენ" ცენტრალურ და სამხრეთ ისრაელზე თავდასხმებისთვის. პრემიერმინისტრის თანახმად, ისრაელი გააგრძელებს ღაზის სექტორზე შეტევას.
ტერორისტულმა დაჯგუფებამ ჰამასმა ცენტრალური ისრაელის მიმართულებით 130 რაკეტა გაუშვა. თელ-ავივის სამხრეთით, ქალაქ ჰოლონში თავდასხმის შედეგად 1 ადამიანი დაიღუპა და 8 - დაშავდა, მათ შორის 5 წლის ბავშვი.
მედიის ინფორმაციით, ისრაელის მთავარი აეროპორტი ბენ-გურიონი რომელიც თელ-ავივიდან 20 კილომეტრითაა დაშორებული დროებით დაიხურა.
სარაკეტო თავდასხმის ქვეშ მოექცა სხვადასხვა ქალაქები ცენტრალურ ისრაელში, მათ შორის რიშონ ლე-ციონი, რამათ განი, სდოტი და ტაიბე. განგაშის სიგნალი ისმის შეფელას რეგიონის ქალაქებში, მათ შორის რამლასა და ლოდში.
Times of Israel-ი დიპლომატიურ წყაროზე დაყრდნობით წერს, რომ ჰამასს მდგომარეობის დეესკალაცია სურდა, თუმცა თქვა, რომ თუ ისრაელი შეტევას არ შეწყვეტდა, პასუხის გასცემდა მოწინააღმდეგეს. დიპლომატის თანახმად, ისრაელს ესკალაციის დასრულებასთან დაკავშირებულ შემოთავაზებაზე პასუხი არ გაუცია. მანამდე გამოცემა წერდა, რომ ისრაელი ჯერ მზად არ არის ცეცხლის შეწყვეტაზე საუბრისთვის, თუმცა იმის გათვალისწინებით, როგორ განვითარდება მოვლენები, შესაძლოა, ცეცხლის შეწყვეტაზე საუბარი ხვალ დაიწყოს.
ცენტრალურ ისრაელზე სარაკეტო შეტევის დაწყებამდე ჰამასი ისრაელს დაემუქრა, რომ თუ ისრაელი ღაზის სექტორზე შეტევას არ შეწყვეტდა, ჰამასის შემდეგი სამიზნე თელ-ავივი გახდებოდა.
ისრაელსა და დაჯგუფება ჰამასს შორის მდგომარეობის გამწვავების შემდეგ ორმხრივი სარაკეტო თავდასხმების შედეგად, ისრაელის მედიის ცნობით, ღაზის სექტორიდან ჰამასისა და ისლამური ჯიჰადის ნასროლი რაკეტა ქალაქ აშქელონში სახლს მოხვდა. შედეგად, ორი ქალი გარდაიცვალა და რამდენიმე დაშავდა. ისრაელის საპასუხო ცეცხლს ბოლო 24 საათში ღაზის სექტორში 24 ადამიანზე მეტი ემსხვერპლა, აქედან 9 ბავშვი. ისრაელის თავდაცვის ძალების ცნობით, მათ მოკლეს დაჯგუფება ისლამური ჯიჰადის სარაკეტო დანაყოფის მეთაური.
ინტენსიური სარაკეტო თავდასხმა მას შემდეგ დაიწყო, რაც ისრაელმა დაჯგუფება ჰამასის პირველი ულტიმატუმი არ შეასრულა და ალ-აკსას მეჩეთის ტერიტორიიდან, სადაც ისრაელის პოლიციასა და პალესტინელ დემონსტრანტებს შორის შეტაკებები მიდის, უსაფრთხოების ძალები არ გაიყვანა.
ისრაელის თავდაცვის ძალების თქმით, ბრძოლა რამდენიმე დღეს გაგრძელდება და ისინი ღაზის სექტორში სახმელეთო ოპერაციის დაწყებას არ გამორიცხავენ.
პარალელურად გრძელდება შეტაკებები ისრაელის პოლიციასა და პალესტინელ დემონსტრანტებს შორის. დემონსტრაციები იერუსალმისი გარდა, ტარდება ქალაქ ლოდშიც, სადაც მოვლენებს ერთი არაბი ისრაელის მოქალაქე ემსხვერპლა. დემონსტრანტები ლოდში ებრაელთა სახლებს მოლოტოვის კოქტეილებსა და ქვებს ესვრიან. მოკლული არაბი, როგორც პოლიციამ გაარკვია ერთ-ერთ 34 წლის ებრაელს ემსხვერპლა. მკვლელი დაკავებულია.
დაძაბულობა იერუსალიმში, ალ-აკსას მეჩეთთან პალესტინელებისა და ისრაელის პოლიციის დაპირისპირებას მოჰყვა. გასულ დღეებში გავრცელდა ინფორმაცია იერუსალიმის შაიხ ჯარას რაიონიდან პალესტინელთა შესაძლო გასახლების შესახებ, რასაც ამ უკანასკნელთა პროტესტი მოჰყვა. ასევე, 10 მაისს ისრაელი იერუსალიმის დღეს აღნიშნავს, დღეს როდესაც 1967 წლის არაბეთ-ისრაელის ომში ქალაქის რამდენიმე მონაკვეთი აიღეს.
ღაზის სექტორი პალესტინელთა ანკლავია, რომელსაც დაჯგუფება ჰამასი მართავს.
