გადაცემა პოზიციასთან ინტერვიუში დმიტრი მედვედევს საქართველოს ოკუპირებული ტერიტორიებიდან დევნილი ადამიანების შესახებაც დაუსვეს შეკითხვა, რის პასუხადაც რუსეთის პრემიერმა განაცხადა, რომ დევნილების საკითხი რუსეთის პრობლემა არაა.
"ეს საქართველოსა და სამხრეთ ოსეთს შორის შიდა ურთიერთობის პრობლემაა. ეს ადამიანებს შორის ურთიერთობის პრობლემაა. ჩემთვის ძალიან სამწუხაროა, რომ არსებობენ ლტოლვილები. ეს ნამდვილად დიდი პრობლემაა თქვენი ქვეყნისთვის, იმ ხალხისთვის, ვინც დაკარგა სახლი, მაგრამ მიაქციეთ ყურადღება, რომ მანამდე სხვა პრობლემაც იყო, სანამ დაიწყებოდა ეს სამხედრო კონფლიქტი საქართველოსა და სამხრეთ ოსეთს შორის. იყვნენ ადამიანები, რომლებიც ტოვებდნენ საკუთარ სახლს, ამ შემთხვევაში უკვე ოსებს ვგულისხმობ. ამ პრობლემას, სამწუხაროდ, ღრმა ისტორიული ფესვები აქვს. ჩვენ გვსურს, რომ ის მოგვარდეს. სწორედ ამიტომ, მე ვთვლი, რომ აუცილებელია პირდაპირი მოლაპარაკებების წარმოება, სხვაგვარად ამის მიღწევა შეუძლებელია. შეუძლებელია მუდამ დიდ ქვეყნებზე აპელირება, ამერიკის შეერთებული შტატები იქნება თუ რუსეთის ფედერაცია, რათა გადაწყდეს ეს კონფლიქტი.
შეხედეთ, როგორ ხდება სხვა, ძალიან რთული კონფლიქტების გადაჭრა. ისინი არასოდეს არ წყდება არც ვაშინგტონში, არც მოსკოვში, ისინი ყოველთვის ადგილზე წყდება. ამიტომ უნდა მოიკრიბოთ ვაჟკაცობა და დაიწყოთ პირდაპირი კონსულტაციები: ლტოლვილების ბედზეც, ძალის გამოუყენებლობის რეჟიმზეც, რაზეც, სამწუხაროდ, ქართული მხარე უკან არ იხევს. ასევე სხვა საკითხებზე, მით უმეტეს, რომ მთელი რიგი ეკონომიკური პრობლემების მხრივ საერთო ჯამში სიტუაცია გაუმჯობესდა. მე მგონი, ესეც ბოლო რამდენიმე წლის მნიშვნელოვანი შედეგია", - აცხადებს რუსეთის პრემიერმინისტრი.
ჟურნალისტმა ნინო შუბლაძემ მას შეკითხვა იმის შესახებაც დაუსვა, რომ საერთაშორისო სამართლის პრინციპების თანახმად, პასუხისმგებლობა ლტოლვილების უსაფრთხოდ დაბრუნებზე ეკისრება იმ მხარეს, რომელსაც ტერიტორიაზე ეფექტური კონტროლი აქვს, კონკრეტულად კი რუსეთს, რადგან ოკუპირებულ ტერიტორიებზე დღემდე მისი ჯარი დგას. მედვედევმა ჟურნალისტს კითხვითვე უპასუხა: "თქვენ გინდათ, რომ მე ვაღიარო ეფექტური კონტროლი ამ ტერიტორიაზე?".
"მე არ შემიძლია ეს ვაღიარო, იმის მიუხედავად, რომ მე მოვაწერე ხელი ბრძანებულებას საერთაშორისო სამართლის ორი სუბიექტის აღიარების შესახებ. მე ვთვლი, რომ ამ სიტუაციაში ეს იყო ერთადერთი შანსი ხალხის გადარჩენის, რადგან, სამწუხაროდ, რომ არ ყოფილიყო აღიარება, გულახდილად ვთქვათ, ამ ტერიტორიის (აფხაზეთისაც) ძალით მიტაცების მცდელობა, დიდი ალბათობით, გაგრძელდებოდა. მე ამაში ეჭვი არ მეპარება.
თქვენ იცით, რომ თქვენი ქვეყნის სამხედრო ბიუჯეტი 2003 წლიდან 2008 წლამდე პრაქტიკულად 50-ჯერ გაიზარდა? ეს ხომ ისე უბრალოდ არ ხდებოდა, არამედ სწორედ იმიტომ, რომ ძალით აპირებდნენ წესრიგის დამყარებას. თუმცა ახლა ამაზეც კი არ ვლაპარაკობ. მე არ შემიძლია ვაღიარო ტერიტორიების ეფექტური კონტროლის არსებობა რუსეთის ფედერაციის მხრიდან. და ამას ავხსნი ერთი მარტივი მიზეზით: ჩვენ არ ვართ დაკავებული არანაირი საოკუპაციო საკითხებით. ჩვენ არ გვაქვს ისეთივე სიტუაცია, როგორიც იყო, მაგალითად, გერმანიაში მეორე მსოფლიო ომის დასრულების შემდეგ, ან სხვა რომელიმე ქვეყანაში. დიახ, ჩვენ გვყავს სამხედრო კონტინგენტი, რომელთაც შესაბამისი ქვეყნის თხოვნით ჩვენ იქ ვაყენებთ. ის არაფერში არ ერევა, ის უბრალოდ უზრუნველყოფს იმ სტატუსკვოს შენარჩუნებას, რომელიც იქ შეიქმნა და ასევე იმას, რომ ხალხი არ განადგურდეს.
რაც შეეხება სიტუაციის ეფექტურ კონტროლს, ამას ახორციელებენ სამხრეთ ოსეთისა და აფხაზეთის სახელისუფლო ორგანოები. და, იცით, შეიძლება ეს დაუჯერებლად ჟღერდეს, მაგრამ მე ასე გეტყვით. ჩვენთვის სულაც არაა ყოველთვის მარტივი მათთან სხვადასხვა საკითხებზე მოლაპარაკებების წარმოება, რადგან ისინი გვპასუხობენ: ნუ ერევით, ეს ჩვენი საქმეა, ეს ჩვენი ტერიტორიაა, ეს ჩვენი ქვეყანაა. ანუ, ამ თვალსაზრისით, ჩვენ მხოლოდ თავდაცვით ამოცანებს ვასრულებთ და მეტს არაფერს", - ამბობს ინტერვიუში მედვედევი.
