საბერძნეთის ხელისუფლება ცდილობს საერთაშორისო კრედიტორებთან შეთანხმებულ ვადებში გააუმჯობესოს ბიუჯეტის მაჩვენებელი, რათა 110 მილიარდი ევროს დახმარების მორიგი ტრანში მიიღოს. ამიტომ, მთავრობამ გადაწყვიტა კიდევ უფრო გაამკაცროს ეკონომიკური პოლიტიკა - უძრავ ქონებაზე გაზარდოს გადასახადი და ათობით ათასი საჯარო მოსამსახურე გაათავისუფლოს სამსახურიდან. ”ქამრების მოჭერის” პოლიტიკის ფარგლებში ხელისუფლებამ გადაწყვიტა 1200 ევრომდე პენსიები 20%-ით შეამციროს, ასევე შეუმციროს დახმარებები ყოფილ სახელმწიფო მოხელეებს, რომლებიც სამსახურიდან 55 წლის ასაკამდე გათავისუფლდნენ. გარდა ამისა, წელს მთავრობა 30 ათას სახელმწიფო მოხელეს რეზერვში გადაიყვანს და მათ ხელფასებს 40%-ით შეამცირებს. „ამ გადაწყვეტილებებმა ბაზრებსა და ჩვენს პარტნიორებს უნდა აჩვენოს, რომ საბერძნეთს სურს და შეუძლია შეასრულოს მასზე დაკისრებული ვალდებულებები და ევროზონისა და ევროკავშირის შიდა ელემენტად დარჩეს” - განაცხადა საბერძნეთის მთავრობის წარმომადგენელმა ილიას მოსიალოსმა.
გამკაცრებული ეკონომიკური პოლიტიკის ფონზე გავლენიანი პროფკავშირები ტრანსპორტის თანამშრომლებს აერთიანებენ და პროტესტის ნიშნად გაფიცვის მოწყობას გეგმავენ.
