კაფე გალერეის გახსნა გრიბოედოვზე

ასეთი ადგილი თბილისში აუცილებლად უნდა ყოფილიყო, მაგრამ რატომღაც აქამდე არ არსებობდა - ასე კონკრეტულად დაახასიათა ახალი კაფეგალერეა გრიბოედოვზე ერთმა ახლად გაცნობილმა გერმანელმა ადამიანმა.  აქ დიდი და ნათელი სივრცეა, აგატა უგემრიელეს რამეებს ამზადებს, ეზოც ისეთი მყუდროა, რომ ჩაჯდები და წასვლაზე აღარ გეფიქრება და დენსფლორიც იმაზე გაცილებით დიდია, ვიდრე პეროვსკაიას კაფე გალერეაში.

ახლა კაფე გალერეა ზუსტად იმდენ ადამიანს დაიტევს, რამდენსაც მოსვლა მოუნდება და გაუხარდება. თბილისის უკანასკნელ უკლუბო ეპოქაში, კაფე გალერეა თითქმის ერთადერთი ადგილი იყო, სადაც პარასკევ-შაბათობით კარგი ფართი კეთდებოდა. ერთი სიტყვით, ახალმა ადგილმა სულზე მოუსწრო, ახლა მაგიდებს შორის ჩატევა აუცილებელი აღარაა და ფართიფრთები თამამად შეგიძლიათ აქნიოთ - აქეთ-იქით, წინ და უკან.

ადგილმდებარეობა ზუსტად ისეთი აქვს, რომ უნდა ინატრო: აკადემიის ასასვლელთან, სახინკლე ფასანაურის პირდაპირ, ეს ორი ლენდმარკი წარუშლელია თბილისელთა გონებაში და კაფესაც შესაბამისად ყველა ადვილად აგნებს. ეს ხუმრობით ვთქვი, ისედაც ძალიან ადვილია გრიბოედოვის ქუჩის ბოლოში ორსართულიანი ყვითელი სახლის შემჩნევა, რომელიც აწი სულ სავსე იქნება. ხინკლის ფენომენზე კი ზაზა ბურჭულაძესთან შეგიძლიათ წაიკითხოთ.

სასიამოვნოა, როცა კაფეს პატრონი არტისტია, სტილსა და გემოვნებაში გარკვეული, ჩამოყალიბებული და კარგი აურის შექმნაში დახელოვნებული. “მე შენ პატარა სივრცეების ჯადოქარი მეგონე და თურმე დიდ ადგილებშიც რა მაგარი ყოფილხარ!” - აი ასეთი კომპლიმენტი მიიღო სანდრო ანთაძემ ვინმე კარგი ადამიანისგან. მშვენიერია, სამხატვრო აკადემიასთან კარგი კაფე აქამდეც უნდა ყოფილიყო.

გალერეის პრეზენტაციაზე თანამედროვე ქართველი მხატვრების გამოფენა მოეწყო, მოგვიანებით კი ეროვნულმა დისკჟოკეებმა (გიორგი ჟორჟოლიანი, თომა, გიო შენგელია, კობერტ, ბაჩო ჩალაძე) დიდებული ტექნო მოსცხეს. ყოველთვის სასიამოვნოა ახალი ადგილის ათვისება, როგორც მუსიკოსებისთვის,  ასევე “ტუსოვშიკებისთვის”. ფართი კაფე გალერეაში გაგიკვირდებათ და დილამდე გაგრძელდა. თან, ძალიან მაგარი ფართი იყო, კარგი ხმით. კარგი ხმა და აპარატურა კი, მოგეხსენებათ, თბილისში ყველგან არ შეგხვდებათ. ამ ტენდენციის დამკვიდრებაც სასიხარულო იქნება,

საქართველოში ჯერჯერობით ფართი ყველაზე ადრე მთავრდება, რაც ნამეტანი სასიამოვნო არაა, განსაკუთრებით მათთვის, ვისაც ძილს კარგ მუსიკაზე აყოლა ურჩევნია. ისიც უნდა ვთქვა, რომ კარგი იქნება, თუ მეზობლები მეტ-ნაკლებად ფართების მოყვარული ადამიანები აღმოჩნდებიან და შექმნილი სიტუაციით ისიამოვნებენ, თორემ ერთი კლუბი, პარაშუტი, მეზობლების სიახლოვის მიზეზით უკვე დაიხურა. ძვირფასო მეზობლებო, იარეთ ფართებზე გალერეაში. თუ მაინცდამაინც ტექნო არ გიყვართ, შეგიძლიათ ტანგოს გაკვეთილებზე იაროთ, ან შაბათობით დაინთოთ ცეცხლი ლათინოსაღამოებზე. კაფე გალერეა ახალი იდეებისთვის ღია და კეთილგანწყობილია.

მწყინს თუ პრეზენტაციაზე არ იყავით და აგატას უგემრიელესი კანაპეები არ გასინჯეთ. ლორის თხელ ფირფიტაში შეხვეული წითელი ბულგარული წიწაკა ტარხუნით და მდნარი ყველით ისეთი მსუბუქი და გემრიელი იყო, რომ... სამზარეულო ახალ კაფე გალერეაში ევროპული იქნება, მენიუ კი -პეროვსკაიას კაფესთან შედარებით გაცილებით უფრო მდიდარი და გემრიელობებით სავსე.

ახალი კაფეგალერეა, გრიბოედოვის 34, ზედ რუსთაველზე, სამხატვრო აკადემიის ასახვევთან.

სამუშაო საათები დილიდან გვიანობამდე. მიბრძანდით.