შსს: ვიწყებთ კანონით გათვალისწინებული ღონისძიების გატარებას აქციის მონაწილეების მიმართ

შინაგან საქმეთა სამინისტრო განცხადებას ავრცელებს და წერს, რომ "რუსთაველის გამზირზე მიმდინარე აქციის მონაწილეთა პროტესტი გასცდა გამოხატვის თავისუფლებისა და მშვიდობიანი შეკრების კანონით დადგენილ ფარგლებს და მიიღო ძალადობრივი ხასიათი". მათი ცნობით, იწყებენ "კანონმდებლობით გათვალისწინებული ღონისძიების განხორციელებას".

"მიუხედავად პოლიციელების არაერთი მოწოდებისა, ისინი არ ემორჩილებიან 
სამართალდამცველთა კანონიერ მოთხოვნებს. აქციის მონაწილეები 
სამართალდამცველებს სიტყვიერად და ფიზიკურად უპირისპირდებიან, ასევე მათი 
მიმართულებით ისვრიან სხვადასხვა საგანს.

გამომდინარე იქიდან რომ აქცია სრულად გასცდა კანონით დადგენილი შეკრება 
მანიფესტაციის ფარგლებს და გახდა ძალადობრივი, საზოგადოებრივი წესრიგის 
აღდგენის მიზნით შინაგან საქმეთა სამინისტრო იწყებს კანონმდებლობით 
გათვალისწინებული ღონისძიების განხორციელებას.

კიდევ ერთხელ მოვუწოდებთ აქციის ორგანიზატორებს, პოლიტიკური პარტიის 
ლიდერებს და მონაწილეებს, დაემორჩილონ სამართალდამცველების კანონიერ 
მოთხოვნებს.

სამინისტრო შეისწავლის აქციის მსვლელობისას მომხდარ ყველა 
კანონსაწინააღმდეგო ფაქტს და თითოეულ ქმედებას მისცემს შესაბამის 
სამართლებრივ შეფასებას" - აცხადებს შსს.

რუსული კანონის მოწინააღმდეგების მიმართ უკვე გამოიყენეს წყლის ჭავლი, წიწაკის სპრეი და ცრემლსადენი გაზი. ასევე, სპეცრაზმმა მომიტინგეებს სცემა.

კომენტარები